“Faza III e zgjerimit të superstradës Tiranë–Durrës, ARRSH hap tenderin 25.64 mln euro”
Autoriteti Rrugor Shqiptar (ARRSH) ka shpallur zyrtarisht hapjen e tenderit për Fazën III të zgjerimit të superstradës Tiranë–Durrës, një nga projektet më të rëndësishme të infrastrukturës rrugore në Shqipëri. Fondi limit i planifikuar për këtë fazë kap vlerën e 2.498 miliardë lekëve, ose 25.64 milionë euro, sipas të dhënave nga Agjencia e Prokurimit Publik.
Objektivi i projektit dhe vendndodhja strategjike
Ky projekt parashikon ndërtimin e një nyjeje lidhëse midis rrugës së Laknasit dhe segmentit të zgjeruar të superstradës Tiranë–Durrës, në kuadër të programit “Transport Rrugor”. Zona e përfshirë, afër kryqëzimit të superstradës me migan Industriale Bylis dhe rrugën e Coca Cola, është një zonë me zhvillim të lartë industrial, çka e bën këtë ndërhyrje jetike për qarkullimin dhe zhvillimin ekonomik.
Problematikat aktuale dhe nevoja për ndërhyrje
Rruga ekzistuese në këtë segment është në gjendje të dobët, me shtresa asfaltike të dëmtuara dhe akses të kufizuar me aksin kryesor Tiranë–Durrës. Lidhjet aktuale bëhen nëpërmjet rrugëve dytësore të mbingarkuara, që krijojnë bllokime të vazhdueshme në trafik.
Çfarë parashikon Faza III e zgjerimit
Faza III parashikon ndërtimin e një nyjeje në disnivel, që do të garantojë lidhje direkte, të sigurt dhe efikase me superstradën. Infrastruktura moderne do të përfshijë mbikalime, tunele të hapura dhe rrugë ndihmëse, duke lehtësuar fluksin e trafikut dhe duke krijuar kushte më të mira për qarkullimin në një zonë me perspektivë të lartë urbane dhe industriale.
Zhvillimet e mëparshme: Faza I dhe II
Ky investim pason dy tenderët e mëparshëm për Fazën I dhe II, që përfshinin zgjerimin e autostradës në 5 km e para, nga kthesa e Kamzës deri te mbikalimi i Rinasit. Punimet nisën në shtator 2024 dhe kanë një kohëzgjatje të parashikuar prej 19 muajsh, me përfundim në pranverën e vitit 2026. Kostoja për këto dy faza arrin në 3.44 miliardë lekë (rreth 34.4 milionë euro me TVSH).
Megjithatë, ARRSH synon përshpejtimin e punimeve për të finalizuar projektin brenda vitit 2025.
Çfarë do të sjellë zgjerimi i superstradës Tiranë–Durrës?
Pas përfundimit të të gjitha fazave, superstrada Tiranë–Durrës do të ketë 8 korsi në total, me shpejtësi të lejuar deri në 140 km/h, duke e kthyer atë në një arterie moderne të transportit kombëtar, që do të reduktojë ndjeshëm kohën e udhëtimit dhe do të rrisë efikasitetin logjistik për bizneset dhe qytetarët./Scan
