Durana Tech Park, hapen thirrjet për aplikime

Hapen thirrjet për aplikime në Durana Tech Park – Qendra e Inovacionit dhe Teknologjisë në Shqipëri

Ministri për Ekonominë, Kulturën dhe Inovacionin, Blendi Gonxhja, ftoi sot bizneset, startup-et dhe inovatorët të aplikojnë për t’u bërë pjesë e Durana Tech Park, parku të parë teknologjik dhe shkencor në Shqipëri.

Përmes një njoftimi në rrjetet sociale, Gonxhja theksoi se prioritet do të kenë aplikantët me numrin më të lartë të punonjësve dhe të ardhurave të deklaruara. Procesi i aplikimit do të zgjasë tri javë dhe përfshin takime dhe seminare online për të mbështetur bizneset në këtë fazë.

“Nëse jeni një biznes i konsoliduar që kërkon inovacion, një startup teknologjik, një institucion arsimor dhe kërkimor apo një nomad digjital, kjo është mundësia juaj për t’u bërë pjesë e një ekosistemi inovacioni dhe rritjeje”, tha Gonxhja.

Me një mbështetje strategjike për ndërmarrjet e vogla dhe të mesme, Durana Tech Park synon të tërheqë investime të huaja dhe vendase, duke nxitur zhvillimin e produkteve dhe shërbimeve inovative me vlerë të lartë të shtuar. Fokusi i parkut është në teknologji, kërkim dhe prodhim, duke krijuar një ekosistem që sjell ekspertizë dhe rritje ekonomike.

Përfitime ekskluzive për bizneset në Durana Tech Park

Pjesëmarrja në këtë park vjen me avantazhe të mëdha fiskale, duke përfshirë:
✅ 0% TVSH dhe 0% tatim mbi fitimin për kompanitë rezidente, një përparësi e madhe krahasuar me rajonin, ku normat tatimore arrijnë deri në 20% dhe 15%.
✅ 0% tatim mbi të ardhurat personale për 10 vite për punonjësit.
✅ Kontribute të ulëta shoqërore për punonjësit, vetëm 95 euro/muaj, me një normë sigurimesh prej 3.4%, duke reduktuar ndjeshëm kostot e punës.

Vendndodhje strategjike për akses në tregje dhe talente

Durana Tech Park është vendosur në Xhafzotaj, një pikë kyçe për bizneset që kërkojnë akses të shpejtë në tregjet kryesore. Vetëm 15 minuta larg Portit të Durrësit – më i madhi në Shqipëri dhe një nga më të rëndësishmit në Adriatik – dhe 20 minuta nga Aeroporti Ndërkombëtar i Tiranës, kjo zonë garanton lidhje të shpejta dhe efikase me tregjet ndërkombëtare.

Gjithashtu, parku ofron qasje në burimet më të mëdha të talentit në vend, duke qenë pranë Tiranës dhe Durrësit, ku ndodhen 75% e institucioneve të arsimit të lartë dhe qendrave kërkimore.

🔹 Aplikimet janë të hapura tani! Mos e humbisni mundësinë për t’u bërë pjesë e ekosistemit më të madh të inovacionit dhe teknologjisë në Shqipëri.