Fundi i sezonit turistik, Euro rikuperon ndaj Lekut, e mbyll javën me rritje.
Euro ndaj Lekut ka shënuar një rikuperim të lehtë pas disa javësh me zhvlerësime të ndjeshme, duke u mbyllur me kursin 97.88 lekë, sipas të dhënave zyrtare nga Banka e Shqipërisë. Ky ndryshim në kursin e këmbimit euro–lek vjen në një moment kur fundi i sezonit turistik po zbeh efektet e hyrjes masive të valutës në vend.
Gjatë muajve korrik–gusht, turizmi dhe dërgesat e emigrantëve ushtruan presion të fortë mbi monedhën europiane, duke e çuar euron në nivele historikisht të ulëta. Me përfundimin e sezonit veror, tregu valutor shqiptar po kthehet gradualisht në ekuilibër, duke i dhënë hapësirë një rimëkëmbjeje të lehtë.
Ekspertët vlerësojnë se kërkesa e shtuar për valutë nga bizneset importuese gjatë shtatorit mund të mbajë gjallë trendin e rikuperimit të euros. Megjithatë, mbetet e paqartë nëse kjo rritje do të vazhdojë në afatmesëm, pasi lekut shqiptar i atribuohet një mbivlerësim i ndikuar jo vetëm nga turizmi, por edhe nga remitancat, investimet e huaja dhe zhvillimet makroekonomike.
Vitin e kaluar, euro ndoqi një ecuri të ngjashme duke u forcuar pas fundverës, megjithëse nuk arriti të rikthehej në nivelet e mëparshme. Aktualisht, analistët mbeten të kujdesshëm, duke theksuar se kursi i këmbimit sot është i ndikuar ndjeshëm nga faktorët sezonalë dhe pritet të ketë luhatje edhe në javët në vijim.
