“Ndërtimi i Durrës Yacht and Marina nuk cenon kushtetutën, hyn në fuqi vendimi i Gjykatës”
Ka hyrë në fuqi vendimi i Gjykatës Kushtetuese, e cila rrëzoi kërkesën e deputetëve të opozitës për shfuqizimin e ligjit që miraton zhvillimin e projektit “Durrës Yachts & Marina”.
Opozita e kishte kundërshtuar ashpër këtë projekt, duke pretenduar se ai shkel Kushtetutën dhe Marrëveshjen e Stabilizim-Asocimit (MSA), çështje që më pas u bë pjesë e gjykimit të Gjykatës Kushtetuese të Shqipërisë.
Gjykata: Asnjë Cenim i Parimeve Kushtetuese
Sipas Gjykatës, procedura e ndjekur nga Kuvendi për miratimin e ligjit ratifikues nuk ka cenuar parimet dhe standardet kushtetuese.
Po ashtu, pretendimet për cenim të MSA-së janë vlerësuar si të pabazuara, pasi ato lidhen me marrëveshjen e miratuar me ligjin nr. 145/2020, ku përzgjedhja e investitorit është bërë pa garë. Sipas Gjykatës, marrëveshja dhe MSA-ja qëndrojnë në të njëjtin nivel hierarkik ligjor, dhe nuk është në kompetencën e saj të vendosë për papajtueshmëri mes tyre.
MSA dhe Procedurat e Konkurrimit
Neni 74 i Marrëveshjes së Stabilizim-Asocimit lejon konkurrencën e subjekteve të BE-së në të njëjtat kushte si kompanitë shqiptare. Megjithatë, në marrëveshjen e bashkëpunimit për këtë projekt parashikohet përjashtimi nga procedurat e zakonshme të konkurrimit dhe tenderimit, me arsyetimin se ato nuk garantojnë përzgjedhjen më të përshtatshme për realizimin e investimit.
Asnjë Ndihmë Shtetërore e Paligjshme
Pretendimet se marrëveshja përbën ndihmë shtetërore janë gjithashtu hedhur poshtë nga Gjykata.
Përjashtimi i projektit nga taksa e ndërtimit dhe kontributi për strehimin social është vlerësuar si i ligjshëm, në përputhje me nenin 155 të Kushtetutës, ligjin për investimet strategjike dhe VKM nr. 1030/2015.
Sipas Gjykatës, ky përjashtim përbën kontribut të shtetit në kapitalin e shoqërisë dhe do të rikuperohet në formë dividenti nga fitimet, një praktikë që është ndjekur edhe më parë për projekte me rëndësi kombëtare.
“Durrës Yachts & Marina”: Një Investim 2 Miliardë Euro
Ky projekt përfshin ndërtimin e:
- Hoteleve dhe rezidencave private.
- Shëtitoreve dhe dyqaneve tregtare (170 njësi).
- Restoranteve dhe zonave superluksoze.
- Mbi 80 mijë metra katrorë hapësira të gjelbra dhe parqe.
Punimet janë të ndara në tre faza kryesore:
1- Ndërtimi i godinave
2-Infrastruktura
3-Marina turistike
Investitori kryesor i projektit është biznesmeni nga Emiratet e Bashkuara Arabe, Mohamed Alabbar, ndërsa vlera e përgjithshme e investimit arrin në afro 2 miliardë euro./Scan
