“The Times: 10 destinacionet më të bukura për të vizituar në Shqipëri – ndër to renditet edhe Durrësi”
Plazhe që rivalizojnë Maldivet, male madhështore dhe një histori unike – Shqipëria është një nga destinacionet më emocionuese në Europë. Në një artikull të veçantë për The Times, gazetarja Marianna Hunt thekson arsyet pse ky vend i vogël ballkanik duhet të jetë ndalesa juaj e radhës.
Shqipëria – Aventurë, natyrë dhe histori në çdo hap
E izoluar për dekada nën regjimin komunist, Shqipëria ka shpërthyer si një perlë e re turistike që ofron gjithçka: nga plazhe ekzotike si në Maldive, te lugina të egra malore, lumenj të paprekur dhe qytete me histori mijëravjeçare.
Në veri, gjenden brigjet më të egra të Mesdheut dhe lumi Vjosë, një nga lumenjtë e fundit të egër në Europë. Në jug, deltën e Vjosës dhe laguna e Nartës janë destinacione për shpendët dhe natyralistët.
1. Ksamil – “Maldive e Europës”
E cilësuar si ndalesa e parë për çdo vizitor, Ksamil ofron plazhe me rërë të bardhë, ujëra kristal dhe ishuj të pabanuar që mund të arrihen me not ose me varkë. Atraksioni i famshëm Syri i Kaltër, një burim i thellë uji me ngjyrë blu intensive, ndodhet vetëm 50 minuta larg.
2. Parku Kombëtar i Thethit – Alpet Shqiptare në lavdinë e tyre
I përsosur për dashamirësit e ecjes dhe natyrës, ky park në veri të Shqipërisë ofron shtigje, ujëvara dhe një faunë të pasur me rrëqebuj, arinj e dhitë të egra. Shtegu “Majat e Ballkanit” lidh Shqipërinë me Kosovën dhe Malin e Zi për një përvojë alpinistike unike.
3. Tirana – kryeqyteti i transformimit
Kryeqyteti i Shqipërisë, Tirana, është një ndërthurje midis historisë komuniste dhe artit modern. Me tregje lokale, galeri, Bunk’art dhe zona të reja si Blloku, qyteti po shndërrohet në një qendër të jetës urbane në Ballkan. Mos e humbisni teleferikun për në malin e Dajtit për pamje panoramike të qytetit.
4. Berati – “Qyteti i një mijë dritareve”
I mbrojtur nga UNESCO, Berati ofron një përvojë autentike arkitekturore me vila osmane, kalatë antike dhe kantina familjare me verë të shkëlqyer. Një kombinim perfekt mes historisë dhe kulinarisë.
5. Liqeni i Shkodrës – xhevahir në veri
Shkodra ofron plazhe të qeta, kala mesjetare dhe një atmosferë tradicionale. Liqeni është vend ideal për pushime natyrore, me pamje nga Mali i Zi dhe mundësi për aktivitete ujore.
6. Saranda & Butrinti – Riviera Shqiptare në kulmin e saj
Saranda është epiqendra e verës për turistët që kërkojnë plazhe, ushqim deti dhe jetë nate. Ndërkohë, Butrinti, një vend arkeologjik i jashtëzakonshëm i mbrojtur nga UNESCO, ofron një udhëtim të rrallë në lashtësi, larg turmave.
7. Parku i Llogarasë – ecje me pamje nga deti
Parku Kombëtar i Llogarasë, në zemër të Rivierës Shqiptare, është një nga vendet më të bukura për shëtitje në natyrë. Shtigjet panoramike dhe ajri i pastër detar e bëjnë ideal për eksploruesit dhe dashamirësit e natyrës.
8. Gjirokastra – qyteti i gurit dhe rrëfimeve historike
Qyteti i Gjirokastrës, i mbrojtur nga UNESCO, ofron një atmosferë unike mes kalldrëmeve, shtëpive osmane dhe muzeve kulturorë. Një perlë arkitektonike dhe historike për çdo vizitor që kërkon autenticitet.
9. Kruja – rrënjët historike të Shqipërisë
Vetëm një orë nga Tirana, Kruja është një destinacion i mbushur me histori dhe tradita. Kalaja, pazari karakteristik dhe Muzeu Etnografik janë pika kyçe për të kuptuar identitetin shqiptar.
10. Durrësi – Lashtësia dhe deti në një vend
Durrësi, një nga qytetet më të lashta të Shqipërisë, është përfshirë në listën e The Times për plazhet e tij, trashëgiminë historike dhe afërsinë me kryeqytetin.
Vizitorët mund të eksplorojnë amfiteatrin romak, pallatin mbretëror të Zogut, si dhe të relaksohen në plazhin 10 km të gjatë ose në Plazhin e Kallmit, një zonë më e qetë dhe autentike. Durrësi ofron një kombinim ideal mes historisë antike dhe jetës bregdetare moderne.
Pse të zgjidhni Shqipërinë për pushimet tuaja?
Shqipëria po shfaqet fuqishëm në hartën e turizmit evropian. E përmendur si “Maldive e Europës”, ajo ofron një shumëllojshmëri peizazhesh, përvoja kulturore dhe çmime të përballueshme për çdo udhëtar. Qoftë për një fundjavë në Tiranë, një aventurë malore në Theth apo një verë në plazhet e Ksamilit apo Durrësit – ky vend po bëhet një nga destinacionet më të lakmuara në Europë.
